COMO CULTIVAR COGOMELOS NO LABORATORIO

Os alumnos e alumnas de 1ºESO estivemos aprendendo algo máis sobre os cogumelos. 

O que nunca nos poderíamos ter imaxinado é que os cogumelos tamén se podesen cultivar.
Nesta ocasión traballamos co micelio de Pleurotus ostreatus ou cogomelo de ostra.
O substrato que empregamos para o cultivo foi serrín deshidratado, o cal fomos hidratando lentamente, engadíndolle auga morna.
Desde que tiñamos todo o medio de cultivo listo, introducimos unha capa do mesmo nunha bolsa esterilizada e microperforada. 
A continuación fomos inoculando o micelio do fungo formando unha pequena capa sobre o serrín introducido. Este proceso repetímolo unhas cinco veces ata rematar co micelio do fungo.
Sellamos a bolsa e a esperar...
En mes e medio, o noso cultivo debería comezar a producir. Irémosvos informando!

REMATARON AS ESTADÍA DE OUTONO EN TREVIA

O INVERNO XA CHEGOU A TREVIA

Co frío e o remate das estadías, Trevia pecha un outono cheo de experiencias, risos e aprendizaxes novas, no que os vosos fillos e fillas foron os verdadeiros protagonistas de cada momento compartido.

Quedan nos nosos recordos moitas desas imaxes que vos farán apreciar o paso do tempo, como fostes e como sodes.

Estamos desexando volver a encontarnos en espazos comúns para vivir momentos e aprendizaxes que nos ilusionen, pero ata ese  momento, esperamos que gocedes dun bo curso. 

Ata pronto!

2º DÍA DE ESTADÍA DE 1º EP EN TREVIA

DE AVIFAUNA A PENAS DE RODAS

Hoxe saímos para coñecer a gran diversidade de aves de todo o mundo que se poden observar en Avifauna.  Ademais poidemos entrar no museo sobre as aves que abriron este ano. Foi moi divertido.

Despois fomos comer a Penas de Rodas. Ali gozamos de trepar, imaxinar e compartir xogos. Un día inesquecible.

1º DÍA DE ESTADÍA DE 1º EP EN TREVIA

PASEANDO POLO BOSQUE

Nunca o bosque nos pareceu tan sorprendente. Un lugar cheo de segredos que fomos capaces de ir descubrindo ao longo do día. Temos tantas cousas que contarvos.
Mirade algúns dos mellores momentos.

PRIMEIRO DÍA DA ESTADÍA DE 1º ESO EN TREVIA

POLOS CANTÍS DE DEXO

Hoxe fixemos a visita á Aula do Mar situada no Monumento Natural da Costa de Dexo-Serantes.

O lugar é espectacular, pero ademais acompañounos Sergio, o educador ambiental do centro de interpretación que conseguiu desvelarnos a paisaxe do litoral facéndonos comprender as diferentes formas de erosión ligadas ao mar e ao vento.

Mirade algún dos mellores momentos do día!

SEGUNDO DÍA DE ESTADÍA DE 5º EP EN TREVIA

O DÍA NO QUE FIXEMOS A SIDRA

Hoxe traballamos en equipo para preparar o zume da mazá que máis tarde se vai transformar en sidra.
Antes de comezar, fomos estudar unha mazaira. Observamos a súa estrutura, as follas, a codia e por suposto, o seu froito: A MAZÁ.
Despois comezamos co proceso de elaboración da sidra: triturámos as mazas e pasámolas á prensa para poder sacar todo o zume posible. E de alí á pipa, que é como se chama o depósito onde vai producirse a fermentación.
Traballamos moitísimo pero tamén poidemos saborear o zume realizado coas nosas mans.

Pola tarde estivemos facendo un proxecto de cidade sostible. Foi xenial. Conseguimos tres proxectos que poderían ser catalogados como Reservas da Biosfera pola UNESCO.
Todo está sendo moi emocionante. Estamos gozando de cada minuto.
Ata mañá!

PRIMEIRO DÍA DA ESTADÍA DE 5º EP EN TREVIA

VISITA Á FEIRA DE CASTRO

Hoxe visitamos o mercado gandeiro de Castro, onde María, a veterinaria do mercado, nos explicou toda a actividade comercial que alí se realiza, desde a chegada do gando á venda, e o posterior transporte. Foinos conducindo por todos os espazos do recinto para que comprederamos o funcionamento xeral dun mercado gandeiro como o de Castro.
Foi moi interesante! 

Despois tivemos a oportunidade de falar cun gandeiro e cun tratante que nos explicaron en que consistía o seu traballo no mercado.

Desde alí, fomos percorrendo o pobo ata chegar á plaza do mercado. Neste lugar fixemos as nosas compras de produtos da terra, pero sempre despois de catar o produto e de negociar o mellor prezo. 

Ao rematar, fomos a comer o polbo, que por certo, estaba delicioso.

Pero ademais tamén tivemos tempo para compartir, xogar, falar, rir e estar cos nosos compañeiros e compañeras.
Estámolo pasando xenial! Esperamos que non nos botedes moito de menos!

TERCEIRO DÍA DE ESTADÍA DE 3º EP

INVESTIGANDO O RÍO MANDEO E DESCUBRINDO O PASATEMPO

Hoxe foi o noso último día de estadía, pero o vivimos con moitísima intensidade.
Despois de almorzar saímos cara Betanzos. Antes de chegar, desviámonos para coñecer o río Mandeo e os segredos que agocha o bosque de ribeira.
A paisaxe é impresionante. Observamos as escadas do río, polas cos salmóns soben río arriba para desovar. Tamén vimos os rápidos que se forman ao pasar o río pola Espenuca  e a cantidade de caneiros e canles que levan a auga ata o muíño.
O bosque fai unha especie de tunel polo que nos fomos paseando e recoñecendo avelairas, ameneiros, freixos, loureiros,...
Gozamos moito de mergullarnos nese bosque misterioso onde a son da auga nos acompañou durante todo o noso percorrido.

Fomos comer ao Parque do Pasatempo. Alí tamén houbo tempo para xogar e deixarnos sorprender polos misterios do lugar. Nunca víramos nada igual. Saíamos dunha sorpresa para meternos noutras.
Foi xenial!

E agora, xa de volta, tócanos descansar e compartir as experiencias vividas con vós.
Ata luns!

SEGUNDO DÍA DE ESTADÍA DE 3º EP

UNHA ÁRBORE MOI ESPECIAL

Hoxe foi un día moi interesante. Estivemos nun souto cerca do colexio, onde aprendimos a observar as árbores cunha ollada diferente.
Os castiñeiros, que alí había, eran ata 10 veces máis grandes ca nós. Todos eran especiais. Cada un o era ao seu xeito. Habíaos alongados e tamén, retortos, grosos e esbeltos, con poucas e con moitas pólas.
Foi incrible sentir como cada unha daquelas árbores nos pareceu especial.
Tocámoslas, sentímolas, agarimámolas e logo, comprometímonos a coidar das pequenas árbores que nacían aos seus pés.

Pola tarde, plantámolas nun testo para coidalas na clase ata que estean preparadas para ser transplantadas.
Estamos desexando contarvos todas as novas experiencias. 
Ata mañá!

ESTADÍA DE 3º EP EN TREVIA

O PRIMEIRO DÍA DE ESTADÍA DE OUTONO

Hoxe pasamos o día aprendendo moitas cousas sobre os cogumelos.
Primeiro na aula, onde comprendimos como eran os cogomelos e moitas curiosidades sobre os máis frecuentes no bosque.
Máis tarde, poidemos poñer en práctica o aprendido coa saída ao bosque. Pasámolo tan ben, que nos pareceu pasara demasiado rápido. Foi xenial!!

Pola tarde, fixemos un estudio dos cogumelos que recollimos e conseguimos identificalos. Foi espectacular ver todo o que levávamos aprendido sobre o mundo dos cogumelos.

Tamén fixemos unha xincana por equipos onde comprobamos a capacidade coa  que percibimos a natureza a través do olfato, do gusto, do tacto e do oído. Descubrimos que somos capaces de descubrir cousas incribles sen utilizar a vista.

Tivemos tempo para o xogo, para compartir cos amigos e amigas, para rir, para aprender e agora toca descansar.

Ata mañá!